İç xəbər

Azərbaycanın sosial-ictimai həyatında hadisə sayılan "İç xəbər" verilişi 1998-ci ilin yanvarın 11-də yaradılıb. İlk vaxtlar gündə bir dəfə- gecə saat 00:00-da efirə çıxan bu veriliş iki ay sonra,  yəni martın 2-dən düz 2000-ci ilin fevralın 4-nə qədər səhər saat 7:40, 8:40 və 9:40- da yayımlanmağa başlayır. Fevralın 19-dan verilişin səhər buraxılışı dayandırılır və "İç xəbər" tamaşaçılarla görüşə yalnız gecə saatlarında gəlir. Ölkədə baş verən sosial-ictimai, kriminal səpkili xəbərlərlə hər kəsin marağına səbəb olan "İç xəbər" qısa zaman kəsiyində çoxlarının  ümid yerinə çevrilir.  Şəhid ailəsinin üzvlərindən tutmuş  kimsəsizlər, əlillər, evi zəbt edilənlər, o cümlədən, qazı, işığı, suyu kəsilənlər də, hüquq-mühafizə orqanlarının süründürməçiliyindən bezənlər də, yalnız bir ünvan tanıyır.  ANS-İ, onun "İç xəbər" verilişini. Yalnız 2002-ci ildə "İç xəbər" bir müddət fəaliyyətini dayandırır. 2004-cü il yanvarın 5-dən veriliş təkrar ekranlara qayıdır və o vaxtdan bu günə qədər tamaşaçıların ən çox sevdiyi xəbər buraxılışlarından biridir. Bərpasından sonra yalnız gecə saat 00.30-da efirə çıxan "İç xəbər"ə tamaşaçılar  artıq bir neçə ildir ki, həm günorta  saat 15:30-da, həm də gecə 23:00-da baxa bilirlər. "İç xəbər" xalqın proqramıdır. Sadə vətəndaşların gündəlik həyatda üzləşdikləri problemləri 10 müxbir yorulmadan xalqa çatdırır. Verilişin aparıcıları- Elnur Hidayətoğlu, Səbinə Heydərova, Nərmin Abbasova, İlkin Kərimovdur. Müxbirlər- Samirə Ağaliyeva, ilahə Vəliyeva, Aytən Abdulova, Sərxan Kamallı. Verilişin redaktoru- Lalə Nurəddin qızı, şef redaktoru- Ləman Əliəşrəf qızıdır.